REBECU. Una pellìcula nd'at a torrare a bogare a campu s'istòria de Donoria, sa fìgia de su re de Rebecu. Si contat chi, cando galu non s'agataiat Bonorva, Rebecu fiat una tzitade manna fraigada in su campu de Santa Lughia. Ma Donoria fiat una majàrgia e sos rebechesos, timende sos malefìtzios suos, no la cheriant. Tando – sighende sa fonte orale regorta dae Giuanne Deriu – obligheint su re a nche la dispatzare dae sa tzitade. «Rebeccu Rebecchei, dae trinta domos non movei» fiat sa risposta sua. Acò sa malària e s'ispopulamentu de Rebeccu chi, a segus, bengeit torrada a fraigare prus in artu, sena però nche colare sa de trinta domos.

Como, gràtzias a s'impinnu de su regista Fabio Manuel Mulas, sàbadu su 4 de santugaine s'at tènnere sa seletzione (casting) de sos atores e sas atoras pro acumprire su traballu tzinematogràficu. Totus sos interessados, dae sos 4 a sos 90 annos, bi podent leare parte presentende·si cun unu documentu de identidade e cun una foto. Sa pellìcula at a èssere realizada in sardu.